ព្រះសីហនុ៖ ស្ត្រីជនជាតិចិន ២នាក់ រងរបួសធ្ងន់ស្រាល និងក្មេងប្រុសម្នាក់ទៀតបានស្លាប់បាត់បង់ជីវិត បន្ទាប់ពីជួបហេតុការណ៍គ្រោះថ្នាក់បើករថយន្តបុកបង្គោលភ្លើង។

ករណីគ្រោះថ្នាក់ចរាចរណ៍នេះបានកើតនៅម៉ោង ១៦:១០នាទី ល្ងាចថ្ងៃទី០៥ ខែកុម្ភៈ ឆ្នាំ២០២៣ នៅចំណុចពយយាយម៉ៅលើផ្លូវបេតុង ស្ថិតក្នុងភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។

សមត្ថកិច្ចមូលដ្ឋានបានបញ្ជាក់ថា គ្រោះថ្នាក់ចរាចរណ៍ដោយការធ្វេសប្រហែសនេះ បង្កឡើងដោយរថយន្ត ១គ្រឿង ម៉ាក UTV ពណ៍ខៀវ បើកបរដោយស្ត្រីឈ្មោះ YAN BAIHUI អាយុ ៣៤ឆ្នាំ ជនជាតិចិន រួមដំណើរដោយឈ្មោះ LIU CHUNQING អាយុ ៦០ឆ្នំា ជនជាតិចិន រងរបួស។ និងក្មេងប្រុសតូចឈ្មោះ CHE YUTAI អាយុ ១៨ខែ (ស្លាប់)។

សមត្ថកិច្ចបានឲ្យដឹងថាមុនពេលកើតហេតុរថយន្តបានបើកបរចេញពីភូមិសុខសាន្ត ឆ្ពោះទៅភូមិកោះតូចនៅលើផ្លូវបេតុង លុះមកដល់ចំណុចកើតហេតុខាងលើបានរ៉េចង្កូតទៅស្ដាំបុក និងបង្គោលភ្លើងសូឡាបំភ្លឺផ្លូវបណ្ដាលអោយខូចខាតរថយន្តផ្នែកខាងមុខនិងវៀចបង្គោលភ្លើង ១ដើម។

បច្ចុប្បន្នរថយន្តបង្កហេតុត្រូវបានសមត្ថកិច្ចអូសយកទៅរក្សាទុកនៅអធិការនគរបាលក្រុងកោះរ៉ុងរង់ចាំដោះស្រាយតាមក្រោយ៕